نبطل بآه//مرقص اقلاديوس

نبطل بأه
بقلم..مرقص إقلاديوس
......
يا ريت
ترجعوا تكتبوا عن الأمانى.
تكتبوا عن زمانى.
تكتبوا عن مكانى.
تكتبوا عن الفرح،
إللى مش عارف
إن كنت أنا إللى نسيته.
و لا هوا إللى نسانى.

يا ريت
نبطل بأه البكا
على إللى راح.
و ياريت
نصاحب بأه
الفجر إللى لاح.

يا ريت
ترجعوا زى زمان،
الأمل يملا كيانكم.
بإيديكم تحفروا الصخر.
لغاية،
ما يبان للناس مكانكم.

ياريت
أنتم و أنا
ننوى نفرح.
أصل نية الفرح
لما تتزرع
فى القلوب تطرح.
و ثمر الفرح
لسه زى زمان بيفرح.

بس إنتم
اصدقوا النية.
و إنتم تلاقوا
الدنيا غير الدنيا.
سامعك بتقوللى
إيه إللى هيجرا يعنى.

أبدا...
العينين
هيا إللى نظرتها هتتغير.
أصل ما فيش حد
يقدر يغير الدنيا،
غير إللى بدع الدنيا.
          ملاح بحور الحكمة
          مرقص إقلاديوس