كاسي حزين //محمد البراقي

بعنوان :كاسي حزين

الكان وكان
راوي الحكاية
قلبي عطشان
تايه بين الويدان
حروف هاد الزمان
وداك  الزمان
كان لكان...!

يا سيادي نشكي حالي
قرقبت الخشبة
حصلوا الكرعين
منعت الكسدة
خرجو العينين
اليد باردة
الفاد  ناره
 شاعلة.....

ياناسي
ناس  البر  عوامة
صاط الريح
هاجت امواج البحر
تقاضات الفهامة
الحنش هجم ع العش
طار ولد الحمامة
زريبة الخيمة بقات
مظلامة...!

كيف ندير
زهري مكبل
يا العالي فك حبالي
مسكون حال حوالي مهول
اعييت نسال ونسول
رجايا فيك عليك
 معول...

كان يا ماكان
يا أحبابي
السنارة يجيها
الحوت بالحزارة
الحبيب خان العشرة
فاضت الكبدة  والمرارة
مشات ايامه
خسارة....!

جوفي مع القوافي جدبان
راضي معنق
محايني بزوج درعان
شويفة شوفي وجدي الصينية
شحري البراد ع الرماد
ضوي المكان شطحي كاسي
راه حزين بين
الكيسان:!
24/9/2018
بقلم محمدالبراقي الحسناوي